A Asociación de Inmigrantes e Retornados Rioplatenses de Lugo organiza unha charla sobre entrevistas laborais
A Asociación de Inmigrantes e Retornados Rioplatenses de Lugo promove unha charla informativa centrada na preparación de entrevistas de traballo en España, unha iniciativa dirixida especialmente a persoas que buscan mellorar as súas oportunidades de inserción laboral.
A charla terá lugar o martes 28 de abril ás 18.00 horas na Casa das Asociacións María Mariño, situada na rúa Monte Faro número 2, en Lugo, e está aberta á participación de todas as persoas interesadas.
A actividade contará coa participación de Alba María Poncelas Téllez, orientadora laboral da Fundación Ronsel, quen ofrecerá orientación práctica sobre como desenvolverse nunha entrevista laboral e explicará que aspectos valoran as persoas responsables de selección de persoal durante os procesos de contratación.
Durante a sesión, abordaranse cuestións clave para afrontar con éxito unha entrevista, co obxectivo de facilitar ferramentas útiles ás persoas asistentes e mellorar a súa empregabilidade nun contexto laboral cada vez máis competitivo.