A Asociación Veciñal As Carballeiras reclama actuacións urxentes na zona sur de Lugo
A Asociación Veciñal As Carballeiras expresou a súa preocupación pola situación que presentan distintos puntos da zona sur da cidade de Lugo, onde a falta de labores de conservación e mantemento está a xerar problemas que afectan tanto á mobilidade como á seguridade da veciñanza.
Dende o colectivo sinalan que a beirarrúa da rúa Escocia atópase nun estado deficiente que complica de maneira considerable o paso dos peóns, especialmente das persoas maiores, das familias con carriños de bebés e das persoas con mobilidade reducida. Segundo explican, resulta necesario acometer unha actuación urxente que permita garantir unhas condicións axeitadas de accesibilidade para todos os usuarios.
Outro dos asuntos que preocupa á asociación sitúase na rúa Armórica, onde existe unha vivenda que, segundo indican, presenta un evidente risco de derrubamento. As Carballeiras considera imprescindible que as administracións competentes adopten as medidas oportunas coa maior rapidez posible para evitar posibles perigos tanto para os viandantes como para os inmobles situados na contorna.
Para a entidade veciñal, esta situación pon de manifesto a necesidade de realizar unha revisión do estado das infraestruturas da zona e de actuar con axilidade para impedir que estas incidencias continúen agravándose co paso do tempo.
A asociación sostén que a conservación dos espazos públicos e a prevención de situacións que poidan supoñer un risco deben constituír unha prioridade para o Concello de Lugo, especialmente nos barrios da zona sur, onde a cidadanía leva tempo reclamando solucións eficaces a problemas que condicionan a súa vida diaria.
Por este motivo, As Carballeiras solicita ás administracións responsables que impulsen as actuacións necesarias para corrixir estas deficiencias no menor prazo posible e asegurar unhas condicións adecuadas de seguridade, accesibilidade e mantemento nos espazos públicos da cidade.