Medio ambiente

O colectivo pide ao Concello de Lugo a actuación inmediata nun espazo situado xunto ao colexio de Venancio Senra polo risco de maleza e falta de mantemento

A Asociación Veciñal Porta de Lugo, representativa do barrio do Sagrado Corazón, amosa a súa preocupación polo estado de abandono no que se atopa unha finca situada na rúa Venancio Senra, xunto ao Colexio do Sagrado Corazón, un espazo de paso habitual para veciños, familias e escolares.

Segundo denuncia o colectivo, a parcela presenta unha situación de maleza descontrolada, con vexetación que invade o entorno, acumulación de sucidade e unha imaxe de evidente falta de mantemento. Esta situación, apuntan, xera sensación de inseguridade, dificulta a visibilidade e podería favorecer a aparición de pragas, algo especialmente preocupante pola súa proximidade a un centro educativo.

A asociación subliña que non se trata dun problema menor, senón dun espazo que forma parte da vida diaria de nenos, familias e persoas maiores do barrio, polo que consideran que debería contar cun coidado axeitado ao tratarse dun punto sensible pola súa localización.

Por este motivo, a Asociación Veciñal Porta de Lugo insta ás concellerías de Vías, Obras e Mobilidade do Concello de Lugo a actuar con urxencia e proceder á limpeza integral da finca, co fin de garantir condicións adecuadas de salubridade, seguridade e convivencia.

O colectivo veciñal lembra que o barrio do Sagrado Corazón non reclama privilexios, senón o mantemento básico e o respecto que, ao seu xuízo, merece calquera zona da cidade, especialmente cando afecta de forma directa á vida cotiá da veciñanza.

Finalmente, confían en que o Concello atenda esta demanda coa rapidez que a situación require e que se avance cara a un maior compromiso co coidado do espazo urbano en Lugo.