A Avenida da Coruña de Lugo loce un novo asfalto
Completouse a renovación do asfalto da Avenida da Coruña no treito que discorre entre as rúas Perpetuo Socorro e Illas Cíes
O tenente de alcalde, Rubén Arroxo, destacou o "bo ritmo" dos traballos, que remataron en tan só catro xornadas.
As obras consistiron na creación dunha nova capa de rodadura baseada en mestura asfáltica en quente, o que asegura o selado do firme fronte á acción da auga superficial, garantindo así a durabilidade da intervención. Ademais, unha vez completado o asfaltado, procedeu a renovarse tamén a sinalización horizontal da vía.
Arroxo subliñou que tanto o Goberno de Lugo como a empresa encargada das obras traballaron de forma coordinada para "intervir reducindo ao máximo as restricións ao tráfico", permitindo que a obra se executase coa menor afección posible á circulación nesta importante arteria da cidade.