A calor extrema dispara o risco de incendio en boa parte da provincia de Ourense e en dous concellos de Lugo
A provincia de Ourense afronta este luns unha xornada especialmente delicada debido á combinación de altas temperaturas e un elevado perigo de incendios forestais. Segundo o Índice de Risco Diario de Incendio Forestal (IRDI), publicado pola Consellería do Medio Rural, unha ampla parte do territorio ourensán atópase en nivel de risco extremo, coincidindo cun episodio de calor que podería deixar temperaturas próximas aos 40 graos.
Os concellos afectados por este nivel máximo de risco inclúen localidades como A Bola, A Merca, A Mezquita, A Veiga, Allariz, Baltar, Bande, Baños de Molgas, Barbadás, Calvos de Randín, Celanova, Cortegada, Cualedro, Entrimo, Laza, Lobeira, Lobios, Maceda, Montederramo, Monterrei, Muíños, O Bolo, Oímbra, Os Blancos, Ourense, Porqueira, Rairiz de Veiga, San Cibrao das Viñas, Sandiás, Sarreaus, Taboadela, Trasmiras, Verín, Viana do Bolo, Vilar de Barrio, Vilar de Santos, Xinzo de Limia, Xunqueira de Ambía, Xunqueira de Espadanedo. No resto da provincia o risco mantense en nivel moi alto, o que obriga a extremar as precaucións para evitar a aparición de lumes.
A situación non se limita unicamente a Ourense. Na provincia de Pontevedra tamén se atopan en risco extremo os municipios de Crecente, Arbo e Salceda de Caselas. Pola súa banda, en Lugo figuran nesta mesma categoría Pedrafita do Cebreiro e Triacastela.
O IRDI elabórase a partir do sistema canadense Fire Weather Index, unha ferramenta que permite estimar a intensidade potencial que podería alcanzar un incendio forestal en función das condicións meteorolóxicas e do estado da vexetación. Canto máis elevado é o índice, maior é a capacidade de propagación do lume e máis complexas resultan as tarefas de extinción.
Ante este escenario, as autoridades lembran a importancia de evitar calquera actividade que poida provocar un incendio e apelan á máxima responsabilidade da cidadanía nunha xornada marcada pola alerta por altas temperaturas e polo elevado perigo para as masas forestais galegas.