A Casa das Insuas de Rábade acollerá este venres unha actividade para descubrir o mundo dos morcegos
A Casa das Insuas acollerá este venres, 9 de outubro, unha actividade divulgativa dedicada a coñecer máis de preto o mundo dos morcegos, organizada pola Asociación Galega de Custodia do Territorio (AGCT) e Morcegos de Galicia.
A xornada comezará ás 19.00 horas no auditorio da Casa das Insuas cunha charla introdutoria na que se abordarán diferentes aspectos relacionados con estes animais e coa súa importancia no medio natural. A actividade será impartida por Roberto Hermida, da AGCT e de Morcegos de Galicia.
A partir das 20.00 horas, os participantes realizarán un paseo ata o río para tratar de escoitar e observar os morcegos no seu hábitat. Para facilitar a súa localización e identificación empregaranse detectores de ultrasóns e visores térmicos.
A organización sinala que non é necesario levar ningún material específico e anima a participar a todas as persoas interesadas en coñecer mellor estes animais e gozar dunha actividade ao aire libre.