A CEL impulsa unha xornada sobre igualdade centrada nas pemes e na súa aplicación práctica
A sede da Confederación de Empresarios de Lugo Confederación de Empresarios de Lugo acolleu a primeira das xornadas divulgativas impulsadas no marco do Gabinete Técnico de Igualdade, unha iniciativa financiada pola Xunta de Galicia e o SEPE, centrada nesta ocasión en achegar a materia de igualdade cun enfoque adaptado á realidade cotiá das pemes.
A sesión foi inaugurada por Guadalupe Hervera, técnica do área xurídica, laboral e de igualdade da CEL, e por Eva Amores, coordinadora do Gabinete de Igualdade da Confederación de Empresarios de Galicia.
Durante a súa intervención, Hervera subliñou que a igualdade non debe entenderse só como unha reivindicación histórica, senón tamén como un elemento de transformación para as organizacións, destacando que, tras o desenvolvemento normativo dos últimos anos en España, cómpre situar esta cuestión na axenda das pemes e microempresas con solucións adaptadas á súa realidade.
A xornada desenvolveuse cun formato participativo e transversal, no que se abordaron diferentes políticas do ámbito laboral, incluíndo a súa coordinación coas medidas de seguridade e saúde no traballo.
Un dos puntos de maior interese foron as experiencias prácticas achegadas por Ángel Álgora, director de Persoas e Acción Social da Cooperativa Cooperativa Aira, e por David Siejas, director de Recursos Humanos, Saúde e Seguridade de AMSlab e presidente da Asociación de Capital Humano. Ambos coincidiron en que a aplicación de medidas de igualdade vai máis aló da implantación formal de protocolos ou plans obrigatorios, destacando que a súa integración real nas políticas internas pode mellorar a xestión e a competitividade das empresas. A sesión contou tamén coas achegas técnicas de Cristina Pérez, consultora de recursos humanos e igualdade en Grupo Isonor.
No relativo á programación futura, a CEL anunciou unha nova xornada informativa o 18 de xuño, entre as 10:00 e as 13:00 horas, tamén na súa sede central en Lugo. Baixo o título “Igualdade: todo o que as persoas traballadoras e as empresas necesitan saber para garantila”, o encontro abordará desde nocións básicas ata medidas de prevención da discriminación e o acoso, así como boas prácticas. Participarán Mª Eugenia Fernández Fortes, consultora en igualdade, prevención de riscos laborais e protección de datos de Grupo Isonor, e Rocío Guitián, responsable de Recursos Humanos de Torre de Núñez.