A CHMS actuará en 18 quilómetros de leitos fluviais de ríos do centro e sur da provincia
A Confederación Hidrográfica do Miño-Sil (CHMS), organismo autónomo dependente do Ministerio para a Transición Ecolóxica e o Reto Demográfico, inicia traballos de conservación e mellora de 18 km de leitos fluviais nos municipios de Castroverde, A Pastoriza, Outeiro de Rei, Cospeito, Chantada e Rábade.
“Nun total aproximado de 18 km dos ríos Mirandela, Ladra, Guisande, Asma e Miño, co obxectivo de aminorar os riscos de inundacións en momentos de intenso caudal”, explicou Quiroga, presidente da CHMS.
“Realizaranse actuacións de restauración hidrolóxico-forestal para o control da erosión e a protección de marxes en zonas concretas, a través de solucións baseadas en técnicas non invasivas e ambientalmente sostibles”, lembrou o presidente.
Traballos programados co obxectivo de conservar e restaurar a hidromorfoloxía natural dos leitos fluviais para mellorar a súa resiliencia e adaptación ao cambio climático; consistentes na retirada de árbores, troncos e pólas tombadas sobre o dominio público hidráulico e a zona de servidume que provocaban numerosos taponamentos; así mesmo procederase á talla, torado, amoreado e retirada de múltiples árbores secas caídas ou en pé presentes nos treitos de actuación.
“As actuacións previstas contribúen a mellorar e restaurar o bosque autóctono de ribeira para recuperar a morfoloxía fluvial natural do río”, concluíu Quiroga.
O investimento estimado é de 190.000 €, cofinanciados polo Fondo Europeo de Desenvolvemento Rexional (FEDER), cunha achega do 60 % do orzamentado, no marco do Programa Operativo 2021-2027.
Estes traballos enmárcanse no Obxectivo Específico 2.4, que pretende “Favorecer a adaptación ao cambio climático e a prevención do risco de catástrofes, así como a resiliencia, tendo en conta os enfoques baseados nos ecosistemas”, que están suxeitas ao cumprimento da Condición Favorecedora 2.4 “Marco eficaz de xestión do risco de catástrofes”, de acordo co establecido no Regulamento (UE) 2021/1060 do Parlamento Europeo e do Consello.