Sociedade

A central sindical chama á mobilización xeral e alerta dun avance de políticas “antidemocráticas” e de recorte de dereitos en Galicia

A Confederación Intersindical Galega (CIG) decidiu trasladar a Lugo o seu acto central do Primeiro de Maio como resposta ao que considera unha deriva “autoritaria e golpista” do Partido Popular, tras a recente moción de censura coa que, segundo denuncia, se produciu unha toma do goberno municipal en termos que cualifica de inaceptables.

A organización sindical asegura que non permanecerá pasiva ante o que interpreta como unha escalada de prácticas que erosionan dereitos da maioría social e que apuntan a un modelo político de carácter cada vez máis autoritario. Nese contexto, fai un chamamento á clase traballadora galega para saír ás rúas este Primeiro de Maio e participar nas 20 mobilizacións convocadas por todo o país.

O secretario xeral da CIG, Paulo Carril, participará na manifestación central que terá lugar en Lugo e atenderá aos medios de comunicación ás 11:45 horas, quince minutos antes do inicio da marcha, que sairá ao mediodía desde o edificio sindical.

A central nacionalista sostén que o contexto actual, marcado polo que describe como un avance do fascismo, obriga a non quedar impasíbel ante novas medidas do PP que, ao seu xuízo, profundan nun proceso autoritario e na imposición de políticas inxustas. Entre elas cita a institucionalización do diálogo social, a redución da representatividade da CIG tanto en termos xerais como nas mesas sectoriais, os cambios no Tribunal Superior de Xustiza de Galicia e o control dos medios públicos de comunicación.

A organización sindical tamén encadra a súa decisión na situación social que considera de especial gravidade en Galicia, derivada do incremento de medidas que cualifica de “autoritarias, antidemocráticas e golpistas”, e que, segundo denuncia, inclúen iniciativas recentes como o plan de control e criminalización das baixas médicas ou o decreto que institucionaliza o chamado diálogo social, interpretados pola central como intentos de limitar a acción sindical da CIG, maior organización do país.