Cultura

O Vello Cárcere acolleu o peche dun proxecto que pon no centro as historias migrantes e o papel da arte na integración

A clausura de “Tecendo Redes: Migración, Arte e Lugo” volveu situar o foco no esencial: as persoas e as súas historias. O acto tivo lugar nun espazo cargado de simbolismo como o Vello Cárcere, onde se puxo de relevo que Lugo se constrúe desde a diversidade como un dos seus piares fundamentais.

Durante a xornada compartiuse reflexión con Waldir Sinisterra, concelleiro de Movementos Migratorios, reafirmando a idea de que a cidade medra a partir do encontro entre culturas e da convivencia plural. O traballo impulsado pola Rede Museística Provincial de Lugo, xunto co compromiso de colectivos como a Asociación Rioplatenses de Lugo, foi sinalado como exemplo de que a integración real nace do recoñecemento mutuo e da creación de redes sociais sólidas.

Neste contexto, a arte preséntase como unha ferramenta clave para facer visibles as experiencias das persoas migrantes, desde unha mirada respectuosa e afastada de calquera paternalismo. Un medio de expresión que permite contar historias propias e fortalecer vínculos coa comunidade.

Lugo preséntase así como unha cidade que acolle, que medra coa xente que chega e que entende que iniciar unha nova etapa vital tamén contribúe a enriquecer o común. Coidar ás persoas que elixen Lugo para vivir significa, tamén, coidar o futuro colectivo.