A comunidade de montes de Orbazai impulsou xunto coa Xunta a rexeneración da senda do río Mera
A Comunidade de Montes Veciñais en Man Común de San Miguel de Orbazai colaborou coa Xunta de Galicia na rexeneración dunha senda no entorno do río Mera.
O delegado territorial, Javier Arias, e o presidente da entidade de montes, Pablo González, visitaron o lugar no que se desenvolveron os traballos, que melloran o acceso tanto a pé como en vehículo á ruta dos Muíños, na parroquia de Orbazai.
As actuacións centráronse na roza e limpeza da vexetación, o refino e replaneo do camiño coa apertura dunha cuneta e a fixación de firme tanto asfáltico como de pedra.
A intervención permite recuperar o acceso á ruta dos Muíños, chamada así pola relevancia histórica dos muíños do río Mera, que durante séculos foron fundamentais para o abastecemento de fariña á cidade de Lugo. A senda atopábase moi deteriorada polo paso do tempo e presentaba un mal estado de conservación.
As obras foron promovidas pola comunidade de montes mediante un convenio coa Axencia Galega de Desenvolvemento Rural (Agader), que achega o 80 % do orzamento e o investimento total ascendeu a 57.600 euros.