A Deputación de Lugo homenaxea a 23 empregados na celebración de Santa Rita
A presidenta da Deputación de Lugo, Carmela López, presidiu este xoves a celebración do Día de Santa Rita, patroa do funcionariado local, que tivo lugar no Salón de Actos do Pazo de San Marcos. Na cita homenaxeouse a 23 traballadores e traballadoras da institución provincial que deixaron este último ano de prestar servizo público en diferentes servizos provinciais.
Carmela López destacou “o importante papel do persoal público” nunha celebración na que quixo recoñecer publicamente a traxectoria dos 23 traballadores e traballadoras da institución que este ano chegan á xubilación despois de toda unha vida de servizo público, destacando “o esforzo, a responsabilidade e o compromiso” demostrados ao longo da súa carreira profesional.
“Detrás de cada expediente, de cada estrada, de cada actividade cultural, de cada servizo social ou de cada problema resolto, estades vós. Hai nomes, hai historias e hai moitos anos de traballo silencioso que moitas veces non se ve, pero que resultan imprescindibles para que esta institución funcione”, trasladou aos presentes.
A mandataria provincial asegurou que nestes primeiros meses ao fronte da Deputación puido comprobar “o capital humano extraordinario” co que conta a institución provincial e a importancia de contar con profesionais que “coñecen o territorio, saben responder ante as dificultades e entenden o servizo público como unha forma de estar ao lado da cidadanía”.
A presidenta, que estivo acompañada de deputadas e deputados provinciais, así como de representantes da Xunta de Persoal e do Comité de Empresa, tamén tivo un xesto de lembranza para os dous traballadores falecidos no último ano, Luis Freire López, peón da Granxa Gayoso Castro, e María Luisa Caamaño Piñeiro, xefa do Servizo de Expropiacións e Control de Proxectos. “A súa memoria forma parte desta institución e o seu traballo queda como exemplo do mellor servizo público”, sinalou Carmela López quen trasladou este recoñecemento e todo o cariño ás súas familias, amizades e compañeiros e compañeiras.
Durante o encontro, fíxose entrega como agasallo dunha figura de Sargadelos inspirada en Rosalía de Castro ás persoas xubiladas e aos familiares dos traballadores falecidos. Así mesmo, repartíronse os trofeos aos traballadores que participaron o día anterior nos partidos de pádel e fútbol celebrados polo Comité de Empresa e a Xunta de Persoal da Deputación. A xornada concluíu cun encontro de convivencia entre traballadores e traballadoras nos xardíns do Pazo de San Marcos, nun ambiente de recoñecemento, agradecemento e celebración compartida.