A Deputación de Lugo impulsa unha xornada sobre bioconstrución no Lugar de Reque
A Vicepresidencia da Deputación de Lugo organiza, en colaboración coa Asociación Corripa e coa Escola Politécnica Superior de Enxeñería de Lugo, unha xornada centrada na bioconstrución que terá lugar o vindeiro xoves 23 de abril.
Coincidindo coa celebración do Día da Terra e enmarcada no programa de permacultura que se desenvolve no Lugar de Reque, a iniciativa porá o foco no emprego da terra como material construtivo. O encontro contará coa participación de especialistas nestas técnicas como Carolina Sánchez Sanz e Alejandro Fernández Palicio, así como de Walter Secci, membro da Asociazione Città della Terra Cruda de Sardeña, en Italia, entidade que leva a cabo unha destacada labor de divulgación e dinamización arredor das posibilidades do adobe.
A xornada desenvolverase na Sala de Xuntas da Escola Politécnica Superior de Enxeñería a partir das 16.30 horas. A asistencia será gratuíta, aínda que será preciso realizar unha inscrición previa a través do correo electrónico lugardereque@deputacionlugo.org.