O vicepresidente da Deputación de Lugo, Efrén Castro, e a presidenta do CB Breogán, Carmen Lence, mantiveron unha reunión para abordar diferentes aspectos da colaboración entre a entidade provincial e o club de baloncesto, destacando os avances na modernización do Pazo dos Deportes e a planificación a medio prazo. Durante o encontro, repasaron a execución das actuacións solicitadas polo CB Breogán ao final da pasada temporada para cumprir coas esixencias da Asociación de Clubs de Baloncesto (ACB) no inicio do novo curso, como a limpeza da pista, a renovación completa da iluminación e a retirada do equipamento de son da marxe da pista de xogo.
Efrén Castro reafirmou o compromiso da Deputación de Lugo coa modernización das instalacións do Pazo dos Deportes, mencionando o proxecto de instalación dun videomarcador e novo equipo de son na zona central da pista. Esta proposta está actualmente pendente dos estudos técnicos necesarios para avaliar a capacidade da cuberta para soportar a carga do novo equipamento.
Outro dos temas destacados na xuntanza foi a contribución da Deputación de Lugo á consolidación e crecemento do CB Breogán ao longo dos anos. Efrén Castro e Carmen Lence salientaron o contrato de patrocinio para esta temporada, que sitúa á Deputación como o máximo patrocinador tanto público como privado do club, reforzando o seu papel no desenvolvemento do proxecto deportivo.
Ademais, trataron a capacidade do Pazo dos Deportes para responder ao crecemento da masa social do CB Breogán. Ambos coincidiron en sinalar que a construción dunha nova instalación será clave para afrontar as necesidades futuras do club e o aumento dos seus afeccionados. A presidenta do CB Breogán, Carmen Lence, destacou "a implicación da Deputación co Breogán e coas melloras das instalacións", e expresou a vontade do Consello de administración de promover un acordo que involucre a todas as institucións para avanzar cara á construción dun novo pavillón en Lugo.
Segundo Lence, este proxecto permitiría satisfacer as necesidades da sociedade lucense, proporcionando dotacións axeitadas para albergar eventos de primeiro nivel. Efrén Castro subliñou que "con esta xuntanza afondamos na comunicación que mantemos coa dirección deportiva do club, para garantir que as melloras executadas e as que se proxectan se adapten ás rutinas de traballo do equipo e ás necesidades da competición". Ademais, eloxiou o traballo da directiva para reforzar tanto a proxección deportiva como social do CB Breogán, destacándoo como "un club cunha importancia central na historia do deporte galego e un referente fundamental para a promoción do deporte".
Esta reunión marca un novo paso na colaboración entre a Deputación de Lugo e o CB Breogán, reafirmando o compromiso de ambas as entidades por modernizar as infraestruturas deportivas e promover o crecemento e desenvolvemento do club, cunha clara visión de futuro que inclúe a construción dun pavillón moderno e adaptado ás esixencias da masa social e dos eventos deportivos de alto nivel.
