A Despensa do Saa acolle este sábado un recital de poemas de amor con Toño Núñez
A taberna cultural A Despensa do Saa acollerá este sábado, 14 de febreiro, a sesión de poemas de amor titulada A corazón aberto, protagonizada polo escritor Toño Núñez e presentada por Beatriz Dourado, a partir das 20.00 horas.
Desde o ano 2025, por iniciativa do escritor Manuel Vázquez e co visto bo do taberneiro e dinamizador cultural Xosé Manuel Vázquez Saa, vén celebrándose cada quince días no local o ciclo de recitais poéticos denominado Media hora de poesía con….
O formato desta actividade está pensado para ofrecer un espazo recoñecido e agradable tanto para os poetas como para o público asistente, que se mantén sempre moi fiel. Media hora resulta un tempo idóneo para que cada autor poida amosar a súa obra poética e favorecer a comunión coa audiencia, convertendo estas citas nun referente cultural do panorama literario local.