A EPSE de Enxeñaría celebra o Día da Terra cun encontro interxeracional de egresados
A Escola Politécnica Superior de Enxeñaría de Lugo convida a todo o seu estudantado, tanto actual como de promocións anteriores, a participar na celebración do Día da Terra, patrón da escola, nun encontro especial que pon en valor a traxectoria da comunidade universitaria ao longo de case seis décadas.
A celebración terá lugar o 23 de abril ás 12:00 horas no salón de actos da EPSE, nun evento que pretende reforzar os lazos entre pasado e presente da escola a través dun formato de encontro académico e emocional.
Baixo o lema “Estudantes EPSE: o legado que continúa”, o acto busca render homenaxe a todas as persoas que pasaron polas súas aulas, recoñecendo o seu papel na construción do presente e do futuro do centro. Nesta edición, está prevista a participación de representantes das primeiras promocións de grao, que intervirán en nome do conxunto das xeracións de egresados e egresadas.
As persoas interesadas en asistir deberán inscribirse en conserxaría e aboar unha achega de 15 euros antes do luns día 20 ás 14:00 horas.
Ao remate do acto, celebrarase a tradicional churrascada da escola, nun espazo ao aire libre no que a comunidade universitaria compartirá un momento de convivencia nun ambiente festivo.