Deportes

O club acadou un pleno de podios e destacou a evolución deportiva e humana do seu alumnado

A Escola de Karate Dajankai asinou este sábado unha destacada actuación na competición celebrada en Maceda, ao conseguir dez medallas cos dez deportistas que participaron no torneo. O resultado confirma o bo momento deportivo e formativo que atravesa a entidade.

Na categoría avanzada, o equipo obtivo unha medalla de ouro, dúas de prata e tres de bronce, amosando un elevado nivel técnico e competitivo ao longo da xornada. Pola súa parte, os karatecas de iniciación acadaron unha prata e tres bronces, uns resultados que evidencian a progresión da base e o traballo desenvolvido polo club nos últimos anos.

Desde a escola fixeron unha valoración “moi positiva” da competición, destacando non só os éxitos deportivos, senón tamén a evolución persoal do alumnado e a actitude amosada durante toda a xornada. O respecto, a educación e a deportividade, tanto dentro como fóra do tatami, foron sinalados como algúns dos valores fundamentais que definen a identidade da Escola Dajankai.

O club puxo tamén en valor o labor dos adestradores e coachs, que acompañaron aos deportistas en cada combate e ofreceron apoio tanto no aspecto técnico como emocional. Así mesmo, destacou a implicación das familias e das persoas colaboradoras, que contribuíron a crear un ambiente de unidade e respaldo arredor do equipo.

Con este pleno de medallas en Maceda, a Escola de Karate Dajankai reforza a súa presenza nas competicións autonómicas e reafirma a súa aposta por unha formación integral baseada na disciplina, o esforzo, o respecto e a superación persoal.