A Escola Deportiva Shihan celebrou a súa tradicional cerimonia de graos con máis de 160 participantes
A Escola Deportiva Shihan celebrou a súa tradicional cerimonia de graos, unha das citas máis destacadas do calendario anual do club e unha xornada especialmente significativa para alumnado, familias e persoal docente.
Durante o acto fíxose entrega dos novos cintos e diplomas aos participantes, un recoñecemento ao traballo, á constancia e ao esforzo desenvolvidos ao longo da tempada. A actividade converteuse nun momento especial para os máis novos, que puideron ver recompensada a dedicación demostrada durante os adestramentos e a súa evolución deportiva.
Desde a escola destacan que o esforzo diario e a perseveranza forman parte dos valores fundamentais que se promoven entre o alumnado, polo que esta xornada supón tamén un estímulo para continuar avanzando tanto no ámbito deportivo como persoal.
A cerimonia tivo ademais un marcado carácter emocional ao permitir que nenos, nenas e mozos compartisen este logro coas súas familias, que os acompañaron nun momento especialmente importante da súa formación.
Nesta edición participaron máis de 160 alumnos e alumnas, que recibiron ademais distintos agasallos conmemorativos entre os que se incluíu unha bolsa de Mariñeiras, así como unha axenda, un bolígrafo e unha galleta facilitados por Raiola Networks. A entidade quixo agradecer a colaboración e o apoio recibido, destacando que a implicación destas empresas resulta fundamental para continuar impulsando este tipo de iniciativas.