Deportes

Gema Morales, Uxía Folgueira e Roque Mazoy subiron ao podio nas modalidades de kata e kumite e conseguiron a clasificación para a final da competición nacional

A Escola Deportiva Shihan asinou unha destacada actuación na Liga Nacional Cadete e Sénior de kárate, celebrada esta fin de semana en Elche, onde os seus deportistas conseguiron dúas medallas de ouro e unha de bronce, ademais de varios postos destacados e clasificacións para a final da competición.

Gema Morales Ozuna, profesora do club, proclamouse campioa en kata sénior. Ademais, terminou quinta en kumite sénior de menos de 55 quilos, despois de perder a semifinal e o combate polo bronce no último segundo. A pesar de quedar ás portas dun segundo podio, conseguiu clasificarse para a final da Liga Nacional nas dúas modalidades.

Pola súa banda, Uxía Folgueira González, actual subcampioa do mundo e de Europa, acadou o ouro en kata cadete. A karateka disputou seis encontros a un gran nivel e superou con solvencia todas as roldas para facerse coa vitoria. O resultado dálle tamén acceso á final da Liga Nacional, na que afrontará o reto de loitar polo título de campioa de España.

Roque Mazoy Cortiñas, que vén de conseguir a medalla de prata na Liga Nacional sub-21, sumou un bronce en kumite sénior de menos de 67 quilos. O deportista consolidouse así entre os primeiros postos dunha categoría de alto nivel e clasificouse para a final da Liga Nacional tanto na categoría sub-21 como na sénior.

Ademais, Folgueira e Mazoy participaron unha vez máis nos adestramentos convocados pola Federación Española de Kárate. Ela fíxoo na modalidade de kata e el, na de kumite.

A participación da Escola Deportiva Shihan completouse con Nayla Pin e Naiara Pérez, que competiron en kumite. O club tamén destacou o traballo do seu adestrador, Adrián Yáñez, que acompañou o equipo como *coach* e axudou os deportistas a render ao máximo durante o campionato.