A Escola Luguesa de Xadrez abre o prazo de inscrición para o IX campamento 'Xadrez e moito máis'
A Asociación Cultural Xaquedrum e a Escola Luguesa de Xadrez veñen de abrir o prazo de inscrición para a novena edición do campamento “Xadrez e moito máis”, unha proposta educativa e de lecer destinada a nenos e mozos de entre 4 e 16 anos que terá lugar este verán na cidade de Lugo.
A actividade desenvolverase nas instalacións do CEIP Illa Verde entre o 23 de xuño e o 1 de agosto, en horario de 09:00 a 14:00 horas, con opción de ampliación tanto pola mañá como pola tarde. As prazas son limitadas. O campamento conta coa colaboración da Deputación de Lugo, o Concello de Lugo, a Dirección Xeral de Xuventude, Participación e Voluntariado, o diario El Progreso, o propio CEIP Illa Verde e Deporte Galego–Xunta de Galicia.
A iniciativa busca promover a práctica do xadrez desde idades temperás, salientando os seus beneficios na concentración, a creatividade e o desenvolvemento intelectual, ao tempo que facilita a conciliación familiar durante o período estival.
O programa combina o ensino do xadrez, adaptado ás distintas idades, con actividades de tempo libre, propostas deportivas e iniciativas creativas como manualidades, contacontos ou a creación de xogos e pezas con materiais reciclados.
O campamento estrutúrase en tres grupos diferenciados: Xadrez Divertido, para nenos de 4 a 7 anos; Xadrez Máxico, para idades de 8 a 12 anos; e o Campus de Xadrez, destinado a mozos de 13 a 16 anos, cada un con contidos específicos adaptados ao seu nivel.
No grupo de Xadrez Divertido, os máis pequenos combinarán as primeiras nocións do xogo con actividades como recortar, pintar, xogos lúdicos, teatro ou o uso de paracaídas. Pola súa banda, os participantes de Xadrez Máxico tomarán parte en concursos, torneos e xogos, ademais de realizar actividades deportivas e manualidades. No Campus de Xadrez, os mozos recibirán formación máis avanzada, participarán en torneos internos e desenvolverán tamén propostas deportivas e de lecer.
O prezo do campamento é de 70 euros, con descontos para segundos irmáns, antigos participantes e alumnado de centros colaboradores. As inscricións poden formalizarse a través do correo electrónico xaquedrum@gmail.com.