A Federación Veciñal Lucus Augusti reclama solucións urxentes pola situación da radioterapia no HULA
A Federación de Veciños Lucus Augusti dirixiuse ao conselleiro de Sanidade da Xunta de Galicia, Julio García Comesaña, para trasladarlle a situación que cualifican de “insostible” no servizo de Radioterapia do Hospital Universitario Lucus Augusti (HULA), en Lugo, debido ás constantes avarías do único acelerador lineal plenamente operativo.
Segundo denuncian, este equipamento, con máis de dez anos de antigüidade, atende diariamente máis de 60 pacientes oncolóxicos de toda a provincia e presenta fallos recorrentes desde hai máis de seis meses, o que provoca interrupcións frecuentes, reprogramación de sesións e longas esperas para os pacientes. O servizo funciona unicamente de luns a venres, sen actividade en fins de semana nin festivos, o que, segundo explican, agrava a falta de continuidade asistencial.
A federación sinala que nas últimas semanas as incidencias intensificáronse ata o punto de obrigar a suspender tratamentos durante horas ou mesmo reorganizar as sesións ao día seguinte, xerando situacións de incerteza para pacientes que, en moitos casos, tamén están sometidos a quimioterapia e realizan desprazamentos desde zonas rurais da provincia.
Tamén lembran que durante a pasada Semana Santa se produciu unha interrupción prolongada do servizo que mantivo paralizados os tratamentos durante varios días consecutivos debido a novas avarías no equipo, o que consideran especialmente grave pola repercusión directa na continuidade das terapias oncolóxicas.
Desde o movemento veciñal lembran ademais que xa existía un compromiso previo da Consellería de Sanidade para incorporar un novo acelerador lineal co obxectivo de mellorar a situación, sen que, segundo indican, se coñezan avances efectivos ata o momento.
Ante este escenario, a Federación Veciñal reclama a adquisición e instalación inmediata dun novo acelerador de última xeración, a avaliación da ampliación do servizo a sete días á semana para garantir a continuidade dos tratamentos, a derivación temporal de novos pacientes a outros centros mentres non se resolva a situación actual e un reforzo da inversión na sanidade pública, especialmente en servizos considerados esenciais como a radioterapia.
O colectivo lembra tamén a importancia histórica das mobilizacións en Lugo pola dotación deste tipo de servizos sanitarios e advirte de que, se non se producen avances nun prazo breve, poderían iniciarse novas accións reivindicativas. A Federación insiste en que as administracións coñecen a situación e reclama unha resposta inmediata e efectiva para garantir a atención dos pacientes.
CONTESTACIÓN DA XUNTA
A Área Sanitaria de Lugo saíu ao paso das afirmacións realizadas pola Federación de Asociacións de Veciños sobre o servizo de radioterapia do Hospital Universitario Lucus Augusti, cualificándoas de incorrectas e advertindo de que xeran unha alarma inxustificada entre a poboación.
Desde o organismo sanitario subliñan que o servizo conta con dous aceleradores lineais plenamente operativos, cos que se atende a totalidade dos tratamentos oncolóxicos, fronte ás afirmacións que apuntaban á existencia dun único equipo. Estes dispositivos, de alta tecnoloxía, funcionan en quenda de mañá e tarde para dar resposta á demanda asistencial.
A Área Sanitaria considera especialmente grave a afirmación de que os tratamentos estiveron interrompidos durante seis días consecutivos, un feito que nega de maneira rotunda. Segundo explican, as incidencias técnicas puntuais que se produciron non alteraron os plans terapéuticos, xa que as sesións afectadas foron reprogramadas de inmediato, garantindo a continuidade asistencial e o cumprimento das pautas médicas.
Neste sentido, destacan a actuación dos equipos profesionais do hospital, tanto técnicos como especialistas en radiofísica e radioterapia, que interveñen de forma inmediata ante calquera incidencia para resolver os problemas no menor tempo posible.
Ademais, o servizo conta con protocolos establecidos que permiten reorganizar a actividade en caso de incidencias, incluíndo a ampliación de horarios, a habilitación de xornadas adicionais —tamén en sábados— e, se fose necesario, a derivación a outros centros do SERGAS, unha medida que, segundo indican, non foi precisa.
Por outra banda, a Consellería de Sanidade lembrou que xa anunciou un investimento de 2,2 millóns de euros para a adquisición dun novo acelerador lineal de última xeración, actualmente en proceso de tramitación para a súa licitación, co que se reforzarán os recursos existentes.
A Área Sanitaria lamenta a difusión de informacións que considera imprecisas e pouco rigorosas, advertindo de que poden xerar preocupación innecesaria entre pacientes especialmente vulnerables, e reafirma o seu compromiso coa calidade, a seguridade e a continuidade da atención oncolóxica no HULA.
REAFIRMACIÓN DO EXPOSTO POR PARTE DA FEDERACIÓN VECIÑAL
A Federación de Asociacións de Veciños da Provincia de Lugo Lucus Augusti reafirmouse en todas as declaracións públicas realizadas ata o momento sobre o funcionamento do servizo de Radioterapia no Hospital Universitario Lucus Augusti (HULA), e acusou ao Sergas de “faltar á verdade”, “desinformar” e “enganar á opinión pública”.
A entidade sostén que existen numerosas queixas trasladadas por pacientes e familiares sobre o funcionamento do servizo, das que din ter constancia a través de testemuños e cartas. Ademais, critica a situación actual dos aceleradores dispoñibles no HULA, sinalando que, aínda que existen dous equipos, un deles sería “pouco operativo” para a maioría das patoloxías, polo que na práctica diaria só se empregaría un.
Segundo a federación veciñal, ese único acelerador operativo conta con arredor de dez anos de antigüidade e soporta unha elevada carga asistencial, con ata 60 pacientes diarios, o que derivaría nun uso intensivo de máis de dez horas ao día e, ao seu xuízo, podería estar relacionado coas avarías recorrentes.
A organización tamén reclama axilidade na incorporación dun novo acelerador, cuxa licitación xa estaría en marcha, e pregúntase polos prazos previstos para a súa instalación. Neste sentido, esixe coñecer unha data concreta de posta en funcionamento.
No comunicado, a federación describe situacións de incertidume para os pacientes, con interrupcións dos tratamentos, reprogramacións e desprazamentos, nalgúns casos de máis de cen quilómetros, e mesmo esperas sen recibir finalmente a sesión prevista por fallos técnicos.
Tamén achega un resumo de incidencias rexistradas no último mes, no que asegura que houbo varios días nos que non se puido administrar o tratamento por avarías, coincidindo nalgúns casos con festivos, e sinala que estas situacións son comunicadas de forma reiterada á dirección médica e á xerencia do hospital.
A pesar das críticas, a federación veciñal destaca o labor dos profesionais do servizo de Radioterapia, aos que cualifica de “excelentes” e “vítimas da situación”, e aos que agradece o seu traballo diario coas persoas pacientes.
Como propostas, Lucus Augusti reclama ampliar a actividade a sete días á semana, reducir a carga diaria de pacientes para diminuír o desgaste dos equipos e derivar casos a outros centros mentres non se instale o novo acelerador. A entidade advirte ademais de que as interrupcións nos tratamentos poden reducir a súa eficacia terapéutica.
Finalmente, a federación convida ao conselleiro de Sanidade a visitar a sala de espera de Radioterapia no HULA e pide ao Sergas que faga públicos os datos de funcionamento dos aceleradores nos últimos meses, incluíndo incidencias, reparacións e tratamentos aprazados, asegurando que seguirán defendendo un sistema sanitario público e de calidade.