A Feira L de Lugo volverá reunir en outubro aos profesionais da hostalería e da alimentación
A gastronomía, a hostalería e a alimentación volverán ter un punto de encontro en Lugo coa celebración da VI Feira L de Lugo, unha cita promovida pola Asociación de Distribuidores de Hostalaría e Alimentación de Lugo (ADISLUGO) que reunirá no mes de outubro diferentes empresas, produtos e marcas vinculadas ao sector.
O evento terá lugar no Pazo de Feiras e Congresos de Lugo os días 25 e 26 de outubro de 2026, ofrecendo durante dúas xornadas a oportunidade de coñecer de preto a oferta das empresas distribuidoras que desenvolven a súa actividade na provincia.
A feira abrirá as súas portas o domingo 25 de outubro entre as 12.00 e as 20.00 horas. A actividade continuará o luns 26, cun horario de 12.00 a 21.00 horas.
ADISLUGO presenta esta sexta edición como un espazo no que as distribuidoras de Lugo poderán achegar ao público os produtos e marcas cos que traballan diariamente e mostrar a diversidade da súa actividade.
A convocatoria pon tamén en valor o papel que desempeña a distribución dentro da cadea alimentaria e no funcionamento diario dos establecementos hostaleiros, ao actuar como vínculo entre fabricantes, marcas e negocios do sector.
Deste xeito, a Feira L de Lugo consolídase como unha cita dedicada a dar visibilidade á actividade das empresas distribuidoras e a favorecer o encontro arredor dun sector fundamental para a economía e a hostalería de Galicia.