A Fundación Breogán impulsa un novo Torneo 3x3 Sénior para maiores de 30 anos
A Fundación Breogán volverá apostar este verán polo baloncesto popular coa organización dun Torneo 3x3 Sénior que se celebrará os días 26 de xuño e 3 de xullo no Pazo dos Deportes. A iniciativa está dirixida a xogadores e xogadoras maiores de 30 anos e pretende recuperar a emoción desta modalidade cun formato diferente ao habitual.
A principal novidade da competición será a súa estrutura tipo draft, un sistema no que as inscricións se realizarán de maneira individual e será a propia organización a encargada de confeccionar os equipos participantes. Desta forma, búscase fomentar a igualdade competitiva e favorecer a convivencia entre os afeccionados ao baloncesto.
O torneo terá carácter mixto e contará cun límite de dez equipos. Ademais dos encontros deportivos, a programación incluirá diferentes actividades complementarias, como un concurso de triplas, un concurso de twoball e o popular tiro do xamón, así como distintos sorteos para os participantes.
A organización tamén anunciou que os xogadores disporán de equipacións personalizadas e que os partidos estarán dirixidos por árbitros da Federación Galega de Baloncesto (FEGABA), co obxectivo de garantir o correcto desenvolvemento da competición.
Desde a Fundación Breogán animan a todos os afeccionados ao baloncesto maiores de 30 anos a sumarse a esta proposta deportiva, que combina competición, compañeirismo e diversión nun ambiente pensado para gozar do deporte da canastra durante o inicio do verán.