A Hedreira acolle unha sesión vermú sobre a memoria histórica das mulleres negras e o pasado escravista da Coruña

O centro social A Hedreira organiza este sábado, 21 de novembro, unha actividade dedicada á memoria histórica e colonial coa participación do colectivo "Mujeres negras que cambiaron el mundo", que presentará dous proxectos de investigación. A cita comezará ás 12:00 horas e estará acompañada de petiscos veganos e refrescos nun formato de sesión vermú.
Unha das iniciativas que se darán a coñecer é o proxecto "Mujeres negras que cambiaron el mundo", que busca recuperar e poñer en valor a contribución histórica de mulleres negras en diferentes ámbitos, visibilizando figuras e traxectorias que tiveron un papel relevante e que non sempre recibiron o recoñecemento que merecen.
O segundo proxecto abordará o papel do porto da Coruña nas rutas transatlánticas de persoas escravizadas, afondando na súa función histórica como porto negreiro e na relación da cidade co comercio de persoas durante o período colonial.
A proposta pretende abrir un espazo de divulgación e reflexión sobre estas cuestións, achegando ao público investigacións que contribúen a recuperar episodios da historia colonial e a comprender as súas consecuencias.