A III Ruta Solidaria "Xuntos e Seguros, Camiñamos" recadará fondos para a Asociación Raiolas
A Asociación de Amigos do Camiño de Santiago na Provincia de Lugo e a Garda Civil organizarán o vindeiro domingo 20 de setembro a III Ruta Solidaria "Xuntos e Seguros, Camiñamos", unha iniciativa benéfica que destinará integramente a recadación á Asociación Raiolas, co obxectivo de contribuír ao traballo que desenvolve coa comunidade autista e as súas familias.
A actividade comezará ás 9.00 horas na Praza de Bretaña de Lugo, desde onde as persoas participantes serán trasladadas en autobús ata o punto de inicio do percorrido. A ruta terá unha distancia de 10 quilómetros polo Camiño Primitivo, con saída desde Bascuas e chegada diante da Catedral de Lugo.
A iniciativa conta novamente co apoio principal da Xunta de Galicia e ofrece dúas modalidades de participación, para facilitar que tanto as persoas que queiran realizar o percorrido como aquelas que non poidan facelo poidan colaborar coa causa.
A inscrición xeral ten un prezo de 10 euros e permanecerá aberta ata o 14 de setembro. A cantidade inclúe o desprazamento en autobús ata o inicio da ruta, o seguro e unha camiseta solidaria.
Tamén existe a posibilidade de realizar unha achega mediante o denominado Dorsal 0, cunha contribución de 7 euros, pensado para aquelas persoas que non poidan ou non desexen participar presencialmente na andaina pero que queiran colaborar economicamente coa Asociación Raiolas.
Para formalizar tanto a inscrición como o donativo, a organización habilitou unha conta de Abanca. Na transferencia deberán figurar o nome e apelidos, necesarios para tramitar o seguro, así como a talla da camiseta no caso das inscricións.
As persoas interesadas tamén poden realizar estas xestións ou solicitar información a través do teléfono 638 295 225 ou do correo electrónico lugocamino@gmail.com.
Con esta terceira edición, a Ruta Solidaria "Xuntos e Seguros, Camiñamos" volverá unir deporte, compañeirismo e solidariedade nun percorrido polo Camiño Primitivo, destinando os fondos recadados a apoiar os servizos e iniciativas que a Asociación Raiolas desenvolve con persoas autistas e as súas familias.