A Liga Galega de Karate abre en Lugo unha tempada con récord de participación
O Pazo Provincial dos Deportes de Lugo converteuse no escenario da primeira xornada da Liga Galega de Karate, unha cita que congregou 639 deportistas, desde as categorías prebenxamín ata júnior, pertencentes a 33 clubs de toda Galicia.
A representación lucense chegou da man do Club de Karate de Chantada, a Escola Dajankai de Lugo, a Escola Deportiva Shihan e o Full Karate Club Galaico, que xuntan 150 competidores nesta apertura da tempada.
A competición, estruturada en dous niveis, ofreceu un espazo específico para os karatecas que se inician e que aínda non lograron medallas en probas oficiais ao longo do ano, mentres que o nivel avanzado quedou reservado para todos os participantes e fixo obrigatoria a súa presenza para aqueles que xa subiran ao podio en eventos oficiais.
A xornada, organizada en sesións de mañá e tarde, desenvolveuse sobre seis tatamis, un dispositivo que supón un notable desafío loxístico para a Federación Galega de Karate, encargada de coordinar unha das convocatorias máis multitudinarias do calendario autonómico.