A música antiga e contemporánea toman Lugo co Festival Cidade de Lugo e a Semana de Música do Corpus
Lugo converterase esta semana nun escenario privilexiado para a música clásica grazas á programación do 52º Festival de Música Cidade de Lugo e a Semana de Música do Corpus. Dous concertos de gran nivel ofrecerán ao público unha viaxe sonora dende as cortes europeas do Barroco ata a creación contemporánea.
O venres 23 de maio, ás 20:30 horas, o Conservatorio Xoán Montes acollerá a actuación de La Ritirata, un dos conxuntos de música antiga máis prestixiosos de España. Dirixido polo violonchelista Josetxu Obregón, o grupo presentará Il Spiritillo Brando, un programa dedicado ás músicas cortesás de Italia e España na transición do Renacemento ao Barroco. Xunto a Obregón estarán Tamar Lalo (frautas), Nacho Laguna (tiorba) e Daniel Garay (percusión), nunha formación recoñecida por máis de 450 concertos en 22 países e galardoada co Premio da Cultura da Comunidade de Madrid.
Ao día seguinte, o sábado 24 de maio, tamén ás 20:30 horas, será a quenda do Cosmos Quartet, no Círculo das Artes. O cuarteto barcelonés, fundado en 2014 e con ampla proxección internacional, interpretará Ecos londinenses, un percorrido por obras de Haydn, Adès, Purcell e Britten. A súa versatilidade e elegancia convertérono nun dos cuartetos máis recoñecidos da escena actual.
Estas dúas propostas confirman a aposta do festival pola calidade artística e a diversidade estilística, ofrecendo ao público lucense unha oportunidade única de desfrutar de intérpretes de primeiro nivel internacional.