A Piringalla celebra desde este xoves cinco días de festas con música e actividades
O barrio da A Piringalla, en Lugo, celebrará desde este xoves 14 de maio e ata o luns 18 as súas festas populares, organizadas pola Asociación Veciñal, Cultural e Deportiva San Isidro, presidida por Ricardo Varela.
O delegado territorial da Xunta en Lugo, Javier Arias, participou na presentación oficial dos festexos xunto aos membros da comisión organizadora. Ao longo dos cinco días desenvolverase unha ampla programación con actuacións musicais, atraccións infantís e diversas actividades dirixidas a todos os públicos.
Entre as propostas previstas destacan a entrega dos Bastóns de Ouro San Isidro 2026, unha solta de globos como símbolo da paz, a celebración do X Campionato de Lanzamento de Pantuflas e diferentes exhibicións de zumba.
No apartado musical, a programación arrancará o xoves ás 22.45 horas coa actuación da Charleston Big Band. O venres, á mesma hora, será a quenda de DJ Goteo e do grupo Beatriz. O sábado actuarán o Dúo Estrellas e a Orquestra Cinema, tamén ás 22.45 horas.
A programación musical continuará o domingo coa actuación da Orquestra Solara, que ofrecerá sesión vermú ás 13.30 horas e unha nova actuación ás 19.30 horas.
O luns 18 celebrarase ademais o Día do Neno, unha xornada na que permanecerán abertas as atraccións infantís e na que se ofrecerá unha degustación gratuíta de chocolate con churros para o público máis novo a partir das 20.30 horas.