A Plataforma Feminista de Lugo analiza o tratamento da violencia machista nos medios de comunicación
A Plataforma Feminista de Lugo organiza unha nova sesión do "Espazo de saberes Feministas", unha iniciativa que busca promover a reflexión e a aprendizaxe arredor do feminismo. A xornada celebrarase o sábado 24 de outubro, ás 11:30 horas, no bar do Hostel Portón, situado na rúa Falcón, número 5, e estará centrada no tratamento da violencia machista nos medios de comunicación.
Baixo o título "Xornalismo feminista contra a violencia machista", a sesión estará conducida pola xornalista e activista feminista Carmen G. Magdaleno, que abordará os erros habituais na cobertura das noticias sobre violencia machista e as consecuencias que poden ter para as vítimas.
Durante o encontro analizarase como determinadas prácticas informativas poden responsabilizar as vítimas do sucedido e contribuír á súa retraumatización. Ademais, presentaranse pautas que debe seguir o xornalismo para informar sobre estas violencias desde unha perspectiva feminista e evitar que os medios contribúan a reproducilas.