A Plataforma Feminista de Lugo organiza un encontro veciñal na Milagrosa polo 25N

A Plataforma Feminista de Lugo continúa achegando a conmemoración do 25N, Día Internacional da Eliminación da Violencia contra as Mulleres, aos distintos barrios da cidade coa iniciativa "Encontros nos barrios: De que queres falar?".
A próxima xuntanza terá lugar o venres 20 de novembro, ás 20:00 horas, no salón de actos da Casa María Mariño, situada na rúa Monte Faro, número 2, no barrio da Milagrosa.
O encontro busca crear un espazo para compartir preocupacións e experiencias arredor de cuestións que afectan ás mulleres, como a crise da vivenda, as ameazas de retroceso nos seus dereitos ou outras formas de violencia estrutural. A plataforma anima as veciñas a participar, achegar as súas ideas ou simplemente asistir para escoitar e coñecer as reflexións doutras mulleres.