A Plataforma Veciñal Barrio da Residencia denuncia o deterioro das beirarrúas da rúa da Saúde
A Plataforma Veciñal Barrio da Residencia volveu reclamar ao Concello de Lugo unha intervención urxente para reparar as beirarrúas da rúa da Saúde, denunciando o que considera unha situación de abandono no mantemento desta zona do barrio.
Segundo explica o colectivo, os problemas xa foran postos en coñecemento do Goberno local o pasado 30 de maio, sen que ata o momento se adoptasen medidas para solucionar os desperfectos. Ademais, aseguran que a situación empeorou co paso das semanas, aparecendo novas zonas afectadas ás xa existentes.
A plataforma fai especial referencia ao estado da intersección entre a rúa Doutor Ochoa e a rúa da Saúde, un punto que coincide cun paso de peóns moi utilizado pola veciñanza e polas persoas que se desprazan ao Centro Integral de Saúde (CIS). Segundo indican, a presenza de cascallos e o deterioro do pavimento dificultan o tránsito de cadeiras de rodas e complican o paso seguro dos peóns.
Desde a entidade consideran que o mal estado desta zona supón un risco tanto para os viandantes como para os vehículos que circulan diariamente polo barrio e lamentan que o deterioro continúe avanzando sen que se acometan actuacións de reparación.
A Plataforma Veciñal Barrio da Residencia sostén que a mellora deste espazo permitiría incrementar a seguridade e a accesibilidade, ademais de favorecer unha mobilidade máis cómoda para a veciñanza e para as persoas usuarias do Centro Integral de Saúde.
Por este motivo, o colectivo insta ao Concello de Lugo a actuar con celeridade e executar as obras necesarias para garantir a seguridade dos peóns, mellorar o estado do espazo público e dar resposta a unha demanda que consideran prioritaria para o barrio.