A SD Monterroso despedirá unha tempada histórica cunha gran festa aberta á veciñanza
A SD Monterroso celebrará o vindeiro sábado 4 de xullo a súa tradicional festa de fin de tempada, unha xornada coa que o club poñerá o peche a un ano especialmente destacado e que estará aberta a socios, xogadores, familias, afeccionados e veciñanza en xeral.
A celebración desenvolverase na área recreativa da Peneda e arrancará ás 13.00 horas cunha sesión musical e vermú. Posteriormente, ás 14.30 horas, terá lugar un xantar popular que será un dos actos centrais da xornada.
O menú para os asistentes estará composto por xamón serrano, empanada e churrasco con carne de porco, tenreira, criolo e patacas. Ademais, incluirá sobremesa, café, chupito, pan e bebida. O prezo establecido será de 25 euros para os adultos, mentres que o menú infantil terá un custo de 13 euros para menores de ata 12 anos, mantendo a mesma proposta gastronómica.
As actividades continuarán durante toda a tarde cun programa que incluirá música a cargo dun DJ, entrega de premios, agasallos e sorteos, xogos dirixidos aos máis pequenos, servizo de bar e outras sorpresas previstas pola organización.
As inscricións para participar no xantar permanecerán abertas ata o 2 de xullo no Bar Os Trasnos. A organización habilitou tamén o teléfono 652 474 560 para consultas relacionadas con intolerancias alimentarias ou información adicional sobre a actividade.
UNHA TEMPADA HISTÓRICA
A cualificación de tempada histórica chega avalada polos resultados acadados polos distintos equipos da entidade ao longo do curso. O primeiro equipo asinou unha campaña destacada ao rematar como subcampión de Primeira Autonómica, disputar a final do playoff de ascenso e alcanzar as semifinais da Copa Deputación. Pola súa parte, o Sénior B logrou manter a categoría en Segunda Futgal tras conseguir previamente o ascenso.
Nos equipos de base e categorías inferiores tamén se rexistraron resultados destacados. O conxunto de veteranos acadou o ascenso á División de Honra, mentres que o xuvenil conseguiu subir a Primeira Autonómica. O equipo cadete mantense en Primeira Futgal tras o ascenso conseguido, ao tempo que o cadete feminino continuará un ano máis competindo en Preferente Futgal. Ademais, o infantil logrou o ascenso a Primeira Autonómica e o equipo alevín continuará a súa traxectoria competitiva, completando unha campaña con importantes éxitos deportivos para a entidade.