A segunda ruta solidaria do Camiño Primitivo recadará fondos para Alume Saúde Mental
A Asociación Provincial de Amigos do Camiño de Santiago anunciou a segunda edición da súa ruta solidaria, que nesta ocasión destinará os fondos recadados á entidade Alume Saúde Mental.
A presentación do evento contou coa participación do delegado territorial da Xunta en Lugo, Javier Arias; o presidente da asociación xacobea, Ángel Trabada; os representantes da Garda Civil de Lugo, Jesús Montaña e Carlos Freire; e o presidente de Alume, Manuel Fernández.
O percorrido será de 10 quilómetros polo Camiño Primitivo, unindo Bascuas co centro de Lugo. Os participantes concentraranse ás 9.00 horas na praza de Bretaña, desde onde partirán en autobús ata o punto de inicio.
As inscricións poderán formalizarse ata o 22 de setembro, cun custo de 10 euros, mediante ingreso na conta bancaria da asociación (ES70 2080 0163 8930 4006 5919).
Ademais, quen non poida asistir poderá colaborar adquirindo un “Dorsal 0” por 7 euros, que non implica participación na ruta. Na súa primeira edición, celebrada o ano pasado, a iniciativa permitiu recadar 4.000 euros que se destinaron á asociación ASPNAIS.