A Sociedade Filarmónica de Lugo presenta o concerto “Ecos de Breogán” no Círculo das Artes
A Sociedade Filarmónica de Lugo organiza o vindeiro sábado, 7 de febreiro de 2026, ás 20:00 horas, un novo concerto no Círculo das Artes baixo o título Ecos de Breogán, unha proposta que reúne un destacado elenco de intérpretes e un programa centrado no diálogo entre a música británica do século XX e a creación contemporánea galega.
O concerto contará coa participación de Iria Folgado ao óboe e ao corno inglés, acompañada por Raquel Areal e Sara Areal ao violín, Marta Rodríguez Otero á viola e Millán Abeledo ao violonchelo. Xuntos darán forma a un percorrido musical que combina obras de cámara de gran riqueza expresiva e forte vínculo coa tradición popular reinterpretada desde a linguaxe culta.
O programa inclúe o Cuarteto Fantasía, op. 2 de Benjamin Britten, unha obra temperá marcada pola frescura e a exploración tímbrica, así como o Quinteto para óboe e cordas de Elizabeth Maconchy, exemplo do vigor e da personalidade da súa escrita camerística. Completa esta vertente británica o Quinteto para óboe e cordas de Arnold Bax e os Seis estudos sobre temas populares ingleses de Ralph Vaughan Williams, pezas que afondan na relación entre música académica e tradición popular.
A proposta incorpora tamén unha obra dun creador galego contemporáneo, Adagio para corno inglés e cordas, de Fernando Buide del Real, que achega unha sonoridade introspectiva e actual ao conxunto do programa, reforzando o fío condutor do concerto e a idea de ecos culturais que atravesan épocas e estilos.