A Tinería celebra este xoves A Festa das Flores
A Festa das Flores celébrase o xoves 25 de agosto ó longo de todo o día no barrio da Tineria. É unha das accións de dinamización específicas para o desenvolvemento económico e social do barrio da Tinería que contará con numerosas actividades e dous concursos.
Os concursos serán en dúas modalidades, por un lado O balcón das flores no cal as persoas e comercios do barrio da Tinería poderán inscribirse para participar neste concurso, antes da 12:00 horas do día do evento. Consistirá en decorar o chan do voladizo do balcón, colocar flores suspendidas, amarradas na reixa ou en guías pola fachada. Pódese empregar calquera material, pero as plantas deberán ser naturais, sexan de floración ou non, en substrato vexetal.
Valorarase non só a estética e a creatividade, senón tamén a sustentabilidade da intervención e a versatilidade da proposta en función da estación. Repartiranse tres premios: un primeiro premio consistente nun vale de 350 euros para gastar nos establecementos adheridos a Localmente Lucense, un segundo de 175 euros e un terceiro de 75 euros. Tamén haberá cinco accésits por valor de 25 euros.
O outro será o Concurso infantil de debuxos de flores e xardíns. Os nenos e nenas de ata 11 anos, incluidos, poderán presentar as súas creacións en formato A4 cos seus materiais favoritos. Expoñeranse e sobre as votacións populares farase reconto para a entrega dos premios. O neno ou nena gañador terá un vale de 50 euros para gastar nos establecementos Localmente Lucenses e o segundo e terceiro clasificado recibirán un vale de 25 euros.
Ó longo de todo o día haberá música e un photocall, a partir das 11.00 terá lugar un pasarrúas con carriño musical que percorrerá as rúas do barrio difundindo as actividades do movemento LocaLmente Lucense e tamén un mercadiño de flores. O longo da mañá haberá dous obradoiros Xardineria de balcón dirixido a persoas que desexen aprender a crear un xardín que adorne o seu balcón e queira facer lucir a súa fachada de xeito colorido durante todo e Postais florais para os máis pequenos.
A sesión vermú terá lugar de 13.30 a 15.30 a cargo de DJ Alex Mei e pola tarde haberá outro obradoiro infantil para crear saquiños de perfume floral e ás 19.30 un contacontos a cargo de Caxoto contacontos
Para rematar o día haberá entrega de premios ás 21.30 e ás 22.00 a actuación musical de La Disquetera.
