A UNED de Lugo acolle a presentación de ‘Empeño en florecer’ de María Sánchez
O Centro Asociado da UNED en Lugo acollerá este xoves, 7 de maio, ás 18.00 horas a presentación do libro Empeño en florecer, da autora María Sánchez, nun novo encontro incluído no ciclo “Coñece ao autor”.
A actividade desenvolverase nun formato híbrido que permitirá a asistencia presencial nas instalacións do centro, así como a participación en liña tanto en directo como en diferido, co obxectivo de facilitar o acceso á cultura ao conxunto da cidadanía.
Durante o encontro, María Sánchez realizará un percorrido pola súa obra literaria desde unha perspectiva vencellada á memoria da terra e ás historias que permanecen fóra dos relatos oficiais, propoñendo unha reflexión arredor das raíces da escritura, das voces silenciadas e da conexión co territorio.
Esta iniciativa enmárcase na programación de Extensión Universitaria da UNED de Lugo e consolida o ciclo “Coñece ao autor” como un espazo de encontro entre creadoras e creadores e o público, nun formato aberto que reforza o compromiso da institución coa difusión cultural.
A actividade é de carácter gratuíto e non require certificación, reafirmando así a aposta do centro polo acceso aberto ao coñecemento e á divulgación cultural.