A UNED de Lugo amplía a súa oferta académica cun novo Grao en Intelixencia Artificial e cinco novas titulacións
A UNED ampliará a súa oferta académica para o curso 2026-2027 coa incorporación de seis novas titulacións que tamén poderán cursarse a través do Centro Asociado da UNED en Lugo. Entre as principais novidades destaca a implantación do Grao en Intelixencia Artificial, unha formación deseñada para responder ás novas necesidades sociais, tecnolóxicas e profesionais.
A esta nova titulación súmanse dous dobres graos aprobados polo Consello de Goberno da UNED na súa sesión celebrada o pasado 10 de xullo. Trátase do Dobre Grao en Matemáticas e Física e do Dobre Grao en Psicoloxía e Criminoloxía, dúas propostas que permitirán ao alumnado combinar disciplinas complementarias con amplas saídas académicas e profesionais.
A oferta complétase coa creación de tres novos micrograos: Micrograo en Política e Historia, Micrograo en Democracias en Tempos de Cambio Social e Micrograo en Métodos, Prácticas e Análise da Investigación Social. Estes programas, de menor duración, están orientados á actualización de coñecementos e á adquisición de competencias específicas en ámbitos concretos.
Coa incorporación destas novas ensinanzas, a UNED de Lugo reforza o seu compromiso coa ampliación e diversificación da súa oferta formativa, facilitando o acceso a estudos universitarios innovadores, multidisciplinares e adaptados ás necesidades actuais da sociedade.
O novo Grao en Intelixencia Artificial permitirá ao estudantado adquirir coñecementos en áreas como a programación, a análise de datos, a aprendizaxe automática e o desenvolvemento de sistemas intelixentes, un sector considerado estratéxico e en continua expansión.
Está previsto que nos próximos días a UNED publique na súa páxina web toda a información detallada sobre estas novas titulacións, que se irán incorporando de forma progresiva á aplicación de matrícula de cara ao vindeiro curso.