A UNED de Lugo bate récord de matrícula con 1.245 estudantes e consolídase como referencia universitaria na provincia
A Xunta Reitora da UNED na sede de Lugo celebrou unha sesión na que a dirección fixo balance do curso 2025-2026, un exercicio cualificado como especialmente positivo polos avances acadados en materia académica, social, ambiental, cultural e de xestión. No encontro tamén se puxo de relevo o récord histórico de matrícula, con 1.245 estudantes, unha cifra que consolida o crecemento sostido da institución nos últimos anos.
A directora do centro, Ana Belén Traseira, subliñou que estes datos confirman o papel da UNED en Lugo como universidade pública de referencia na provincia, cun incremento do 12,5 % do alumnado respecto ao curso anterior. Durante a sesión aprobáronse tamén as contas anuais de 2025 e o orzamento para 2027, que ascende a 1.167.788,36 euros, unha contía que permitirá reforzar a actividade académica, a transformación dixital, a atención ao estudantado e os proxectos estratéxicos da institución.
Outro dos puntos destacados foi a implantación do novo grao en Intelixencia Artificial, considerado unha titulación estratéxica para dar resposta ás novas demandas profesionais derivadas da transformación tecnolóxica e dixital. Tamén se puxo en valor o sistema de calidade do centro, que sitúa á sede lucense como o único centro asociado da UNED con nivel 3 de calidade, un recoñecemento ao seu modelo de xestión, transparencia e mellora continua.
No ámbito social e económico, destacouse o impacto da UNED en Lugo na provincia, cun retorno estimado de 13,25 euros por cada euro investido, reforzando o seu papel como motor formativo e dinamizador do territorio. A sesión coincidiu ademais co 18 aniversario da apertura do centro.
A sustentabilidade e a transición ecolóxica tamén ocuparon un lugar central, con iniciativas como #LugoNaturalMente e a Oficina Verde dos Centros Asociados, ademais de programas de educación ambiental e accións aliñadas coa Axenda 2030. Xunto a isto, salientouse o impulso da UNED Sénior, que pasou de 121 a 259 estudantes entre as sedes de Lugo e Sarria, consolidándose como ferramenta de envellecemento activo e participación social.
A presidenta da Deputación de Lugo, Carmela López, valorou positivamente estes resultados, destacando a consolidación da UNED como referente universitario e o seu papel clave para facilitar o acceso á educación superior. Tamén puxo en valor a nova titulación en Intelixencia Artificial, que cualificou como unha aposta estratéxica para o futuro da provincia.