A UNED de Lugo e COGAMI promoven unha formación contra os bulos climáticos
O Centro Asociado da UNED en Lugo, a través da Oficina Verde dos Centros Asociados, impartiu unha conferencia formativa centrada nos bulos climáticos en colaboración coa organización COGAMI.
Na actividade participaron un total de 32 persoas usuarias de COGAMI, nunha sesión orientada a achegar ferramentas para detectar a desinformación climática e comprender os principais retos vinculados ao cambio climático desde unha perspectiva rigorosa e accesible.
A formación foi desenvolvida polo equipo da Oficina Verde da UNED, integrado por Alejandro Fernández, Jessica Cancela e Icía Rodríguez, quen explicaron de forma práctica como identificar noticias falsas, interpretar información científica e fomentar unha actitude crítica fronte aos contidos difundidos en medios de comunicación e redes sociais.
Esta iniciativa enmárcase no compromiso da UNED coa alfabetización climática e coa divulgación do coñecemento, co obxectivo de achegar a universidade á cidadanía e impulsar unha sociedade máis informada, crítica e comprometida coa sustentabilidade.
Con este tipo de accións, a UNED de Lugo reforza o seu papel como axente activo na loita contra a desinformación e na promoción dos valores asociados ao desenvolvemento sostible.