A UNED de Lugo recibe o selo “Calculo + Reduzo” polo seu compromiso coa sustentabilidade
A UNED de Lugo vén de ser distinguida co selo “Calculo + Reduzo” correspondente ao exercicio 2024, unha acreditación concedida pola Oficina Española de Cambio Climático (OECC), organismo adscrito ao Ministerio para a Transición Ecolóxica e o Reto Demográfico.
Esta distinción certifica o labor realizado polo centro universitario no cálculo, rexistro e diminución da súa pegada de carbono dentro do rexistro oficial promovido pola Administración Xeral do Estado, unha iniciativa orientada a impulsar medidas de acción climática entre entidades e institucións.
No caso da UNED de Lugo, o recoñecemento chega tras acadar unha redución do 16,84 % na media da intensidade das emisións durante o período 2022-2024 en comparación co trienio 2021-2023, nos denominados alcances 1+2. Estes datos reflicten a continuidade das políticas impulsadas polo centro en materia de eficiencia enerxética, sustentabilidade e mellora ambiental.
Desde a institución destacan tamén o papel desenvolvido pola Oficina Verde dos Centros Asociados da UNED, creada co obxectivo de ofrecer apoio técnico especializado en cuestións relacionadas coa sustentabilidade, o cálculo e a xestión da pegada de carbono, ademais de prestar asesoramento aos distintos centros da rede.
Neste ámbito, a UNED de Lugo continúa reforzando a súa posición como referente en xestión ambiental e coordinación técnica dentro dos Centros Asociados da UNED. Proba diso é que a Intervención Xeral da Administración do Estado (IGAE) solicitou os datos de consumo correspondentes ao ano 2025 de todos os centros asociados, un proceso no que o centro lucense terá un papel destacado de coordinación e soporte técnico.
A pegada de carbono é un indicador ambiental empregado para medir as emisións de gases de efecto invernadoiro derivadas da actividade dunha organización. A súa avaliación e redución considéranse ferramentas clave para avanzar cara modelos máis responsables e sostibles.
Con esta nova distinción, a UNED de Lugo reafirma a súa aposta pola innovación ambiental, a sustentabilidade e o desenvolvemento de medidas orientadas á loita contra o cambio climático.