A Unidade de Música da Garda Real ofrecerá un concerto na Praza de Santa María
Con motivo do despregamento da Garda Real no seu exercicio anual en Lugo, previsto entre o 5 e o 10 de maio de 2026, a súa Unidade de Música ofrecerá un concerto o sábado 9 de maio na capital lucense.
A actuación desenvolverase na Praza de Santa María ás 18:30 horas, nun evento aberto á cidadanía que permitirá achegar a formación musical ao público nun dos espazos máis emblemáticos da cidade.
A agrupación musical está composta por instrumentos de vento e percusión, cunha ampla capacidade tanto para acompañar actos oficiais como para ofrecer concertos de alto nivel artístico. O seu director é o coronel músico Fernando Lizana Lozano.
Para esta ocasión, o programa será variado e dividido en dúas partes. Nun primeiro bloque interpretaranse obras de raíz e tradición española, mentres que a segunda parte estará dedicada integramente a Galicia, con pezas inspiradas no seu imaxinario musical e nalgunhas das súas melodías máis representativas.
O acceso será gratuíto e libre ata completar o aforo da praza ou ata o límite que establezan as condicións de seguridade fixadas polas autoridades.