A veciñanza de Cervantes mantén as protestas para reclamar melloras na atención sanitaria
A veciñanza de Cervantes volveu concentrarse diante do consultorio de Doiras para reclamar solucións á situación sanitaria que, segundo denuncian, continúa afectando ao municipio. Os participantes na mobilización aseguraron que, malia as demandas realizadas nos últimos meses, o consultorio segue pechado e o centro de saúde de San Román continúa prestando un servizo limitado.
Segundo expuxeron durante a concentración, a atención médica no centro sanitario de San Román redúcese actualmente á presenza dun único facultativo durante unhas poucas horas e non todos os días da semana, unha circunstancia que dificulta o acceso da poboación a un servizo asistencial continuado. Ademais, sinalaron que esta situación resulta especialmente preocupante durante o verán, cando o número de residentes e visitantes no concello aumenta de forma considerable.
Os asistentes á protesta insistiron na necesidade de recuperar a actividade do consultorio de Doiras e de reforzar os recursos humanos dispoñibles para garantir unha atención sanitaria adecuada á veciñanza, especialmente nun municipio de carácter rural e con importantes dificultades de mobilidade para parte da poboación.
Ao remate da concentración, a responsábel local do BNG en Cervantes, Maruxa Bardasco, criticou a falta de solucións por parte da Xunta de Galicia e reclamou a reapertura inmediata do consultorio de Doiras, así como a dotación do persoal necesario para asegurar unha asistencia sanitaria estable e de calidade no centro de saúde de San Román.