Aberto o prazo de inscrición para o campamento de verán do Concello de Castroverde
O Concello de Castroverde vén de abrir o prazo de inscrición para o seu campamento de verán, unha proposta dirixida á conciliación familiar durante os meses estivais e que se desenvolverá entre o 1 de xullo e o 31 de agosto. A organización ofrece a posibilidade de participar por períodos quincenais tanto en xullo como en agosto, co obxectivo de adaptar a oferta ás necesidades das familias.
As actividades levaranse a cabo en diferentes espazos do municipio, entre eles o pavillón polideportivo A Ferrería, a área recreativa da Veiga do Olmo e as piscinas municipais, ademais doutros emprazamentos que se utilizarán segundo a programación.
O campamento funcionará de luns a venres, en horario de 8:00 a 14:00 horas, agás festivos. A entrada dos participantes realizarase no pavillón polideportivo entre as 8:00 e as 10:30 horas, mentres que a recollida será entre as 13:30 e as 14:00 horas, salvo indicación contraria por parte do persoal monitor.
As solicitudes poderán presentarse até o 15 de maio, empregando o modelo dispoñible nas oficinas municipais e na páxina web do Concello. A inscrición poderá formalizarse de maneira presencial, en horario de mañá, ou a través da sede electrónica.
O custo do campamento establécese en 120 euros por mes, aínda que os nenos e nenas empadroados en Castroverde cunha antigüidade mínima de tres meses poderán beneficiarse dunha bonificación do 50 %, reducindo o prezo a 60 euros mensuais. No caso de optar por quincenas, aplicarase a metade da tarifa correspondente.