ALUCEM ofrece atención psicolóxica a 15 persoas con esclerose múltiple, ELA e outras enfermidades neurodexenerativas

LugoXa
O programa, que se desenvolve durante o último trimestre de 2026, tamén inclúe accións de sensibilización para achegar estas doenzas á sociedade e combater o seu descoñecemento
Lidia González_psicóloga sanitaria de ALUCEM
17 Nov 2026

A Asociación Lucense de Esclerose Múltiple (ALUCEM) está a desenvolver durante o cuarto trimestre de 2026 un programa de atención psicolóxica e sensibilización sobre a esclerose múltiple e outras enfermidades afíns, como a esclerose lateral amiotrófica (ELA). A iniciativa está a beneficiar 15 persoas con discapacidade física da provincia de Lugo e busca ofrecerlles apoio emocional, así como contribuír a mellorar a súa calidade de vida e a das súas familias.

O proxecto ten como obxectivo atender de maneira integral as necesidades psicolóxicas das persoas afectadas por estas enfermidades e do seu entorno familiar. Para iso, contempla sesións de atención individualizada nas que se traballan as dificultades emocionais derivadas de convivir cunha doenza crónica que, en moitos casos, ten un carácter progresivamente discapacitante. A través deste acompañamento, a asociación busca proporcionar ferramentas para afrontar as distintas etapas da enfermidade e reducir o impacto que esta ten na vida cotiá.

A iniciativa parte da importancia de ofrecer apoio emocional ás persoas afectadas e ás súas familias, especialmente cando non é posible reverter a evolución da doenza. Neste contexto, ALUCEM considera fundamental traballar para reducir o sufrimento psicolóxico e evitar que pacientes e familiares teñan que afrontar en solitario as consecuencias persoais e sociais destas patoloxías.

Ademais da atención directa, o programa inclúe actividades informativas e campañas de difusión nos medios de comunicación para sensibilizar a poboación sobre a esclerose múltiple, a ELA e outras enfermidades neurodexenerativas. A través destas accións, a entidade pretende combater o descoñecemento, favorecer unha maior comprensión da realidade das persoas afectadas e avanzar cara a unha sociedade máis informada e comprometida coas súas necesidades.

O proxecto enmárcase no Plan de Prioridades da Confederación Española de Persoas con Discapacidade Física e Orgánica (COCEMFE) e está financiado pola Fundación ONCE. A confederación encárgase de xestionar as axudas destinadas aos proxectos prioritarios das súas entidades, así como de prestarlles asesoramento e realizar o seguimento das iniciativas durante todo o proceso.

0.17132592201233