Ampliado o prazo para axudas a incorporación de mozos e para pequenas explotacións
A Consellería do Medio Rural ampliará ata o 15 de decembro o prazo de presentación da licenza municipal de obra e dos diferentes permisos administrativos correspondentes ás axudas de plans de mellora, incorporación de mozos e pequenas explotacións. Así o formalizará o Diario Oficial de Galicia (DOG) nos vindeiros días, aumentando excepcionalmente en tres meses o período marcado inicialmente para aportar esta documentación.
Ante as peticións de diferentes organismos para prolongar dito período co fin de poder emitir os preceptivos permisos, o departamento de Medio Rural decidiu, un ano máis, ampliar o prazo para facilitar a tramitación a gandeiros e agricultores solicitantes destas subvencións e evitar así que perdan as achegas.
Cómpre lembrar que o orzamento desta convocatoria -encadrada no Programa de Desenvolvemento Rural (PDR) de Galicia 2014-2020- chega aos 41 millóns de euros. En concreto, 24 millóns irán destinados a plans de mellora, 14 millóns investiranse na incorporación de mozos á actividade agraria e 3 millóns de euros focalizaranse na creación de empresas para o desenvolvemento de pequenas explotacións.
Ao abeiro da convocatoria do ano pasado, un total de 533 beneficiarios recibiron axuda para acometer plans de mellora, 356 mozos e mozas obtiveron subvención para incorporarse ao agro e 200 persoas solicitantes conseguiron achega para a creación de pequenas explotacións.