Analizan en Lugo os novos desafíos da defensa e a seguridade ante o avance da intelixencia artificial
A xeopolítica, os conflitos internacionais, a ciberseguridade e o avance da intelixencia artificial centran as primeiras Xornadas de Defensa celebradas na UNED de Lugo baixo o título 'Defensa e seguridade no século XXI: da xeopolítica á intelixencia artificial'. O encontro está organizado por ESPIGA, a UNED de Lugo e a Subdelegación de Defensa, coa colaboración da Subdelegación do Goberno, e nace co obxectivo de abordar os principais desafíos que condicionan a seguridade na sociedade actual.
A inauguración contou coa participación da subdelegada do Goberno en Lugo, Olimpia López, que destacou a importancia de desenvolver unha visión crítica ante a cantidade de información dispoñible e fomentar a reflexión sobre os acontecementos que afectan á sociedade. Durante a súa intervención, agradeceu o traballo das entidades organizadoras e advertiu de que "dispoñer de máis información non é sinónimo de comprender mellor o que sucede ao noso redor".
As xornadas reuniron catro especialistas de diferentes ámbitos relacionados coa defensa e a seguridade. Entre eles estivo Mariano Aguirre Ernst, analista internacional especializado en paz e conflitos, que achegou a perspectiva da xeopolítica e das relacións internacionais. Tamén participou Federico Juste de Santa Ana, xeneral de división e xefe de Estado Maior do Mando Conxunto do Ciberespazo, xunto con Javier Candau Romero, subdirector xeral do Centro Criptolóxico Nacional.
O programa completouse coa intervención de Rosa Ricoy Casas, doutora en Dereito e investigadora especializada en dereitos fundamentais e novas tecnoloxías, que incorporou a dimensión xurídica e social aos debates sobre os cambios tecnolóxicos e os seus efectos na seguridade. A iniciativa permitiu así abordar os retos actuais desde perspectivas complementarias, desde a evolución dos conflitos e as ameazas no ámbito dixital ata a protección dos dereitos fundamentais.