Antas de Ulla reabre ao tráfico o tramo entre Peibás e Velanxil tras as obras de mellora
O Concello de Antas de Ulla informou da reapertura ao tráfico do tramo que conecta Peibás con Velanxil, unha vez finalizados os traballos de drenaxe e realimentación executados nas últimas semanas. A actuación permitiu intervir nun punto clave da rede viaria municipal co obxectivo de optimizar as condicións de circulación.
Segundo explicou o executivo local, as obras serviron para reforzar a seguridade viaria, mellorar a evacuación das augas pluviais e renovar o estado xeral da calzada, facilitando así unha circulación máis cómoda e segura para a veciñanza.
Ademais, o Concello avanzou que nos vindeiros meses está prevista a realimentación integral do tramo que une Peibás e Caira por Velanxil. Esta intervención incluirá tamén os núcleos de Peibás e Velanxil e enmárcase na estratexia municipal para continuar mellorando as comunicacións e a calidade das infraestruturas locais.