Antas de Ulla reunirá a 52 participantes na terceira edición do Slalom Centro Xeográfico de Galicia
Antas de Ulla volverá converterse nun punto de encontro para os afeccionados ao motor coa celebración, este 4 de xullo de 2026, da terceira edición do Slalom Centro Xeográfico de Galicia, unha competición que continúa medrando e que nesta ocasión contará coa participación de 52 pilotos.
A alcaldesa do municipio, Pilar García, presentou oficialmente no Concello esta nova edición do evento, destacando a relevancia dunha cita que permite situar novamente a localidade dentro do panorama do automobilismo galego e que, ademais, contribúe a dinamizar a actividade local, atraer visitantes e xerar movemento arredor do deporte.
A competición alcanza xa a súa terceira edición mantendo o mesmo trazado utilizado o pasado ano. Desde a organización explican que se decidiu conservar o percorrido tras a boa valoración recibida tanto por parte dos participantes como do público asistente.
Os organizadores confían en que a xornada se desenvolva con total normalidade e en que os pilotos poidan desfrutar dunha experiencia segura e competitiva, mantendo ao mesmo tempo o atractivo para o público que se achegue ao municipio.
Coa celebración do III Slalom Centro Xeográfico de Galicia, o Concello reforza a súa aposta pola organización de actividades deportivas que contribúan a crear ambiente, impulsar a participación e dar visibilidade a Antas de Ulla máis alá do seu ámbito local.
Desde o Concello tamén agradeceron a colaboración e implicación das persoas participantes, entidades colaboradoras e integrantes da organización que fan posible a celebración desta nova edición, expresando o desexo de que pilotos, equipos e visitantes rematen a súa estancia cunha experiencia positiva.
Antas de Ulla prepárase así para vivir unha xornada na que a emoción, a velocidade e o ambiente festivo serán os principais protagonistas.