Arroxo critica a iniciativa do PP para retirar as figuras de homenaxe a Moncho Reboiras
O portavoz do BNG no Concello de Lugo, Rubén Arroxo, cargou contra a proposición presentada polo Partido Popular no Parlamento de Galicia para instar á retirada das figuras de homenaxe a Moncho Reboiras instaladas en distintas cidades galegas. Segundo afirmou, esta iniciativa evidencia “a facción máis franquista e reaccionaria do Partido Popular” e coincide coa conmemoración do 50 aniversario da morte de Reboiras.
Arroxo lembrou que Moncho Reboiras é considerado pola organización nacionalista como a última persoa asasinada polo franquismo en Galicia e destacou que os actos de homenaxe promovidos ao longo deste ano responden a unha proposta impulsada por unha comisión promotora encabezada polas fundacións Fundación Moncho Reboiras e Fundación Terra e Tempo. O obxectivo desta iniciativa, segundo explicou, é render tributo á súa figura en diferentes puntos de Galicia e contribuír á recuperación da memoria das persoas represaliadas durante a ditadura.
O portavoz nacionalista salientou que o Concello de Lugo participou nesta iniciativa a través dunha intervención artística destinada a lembrar a figura de Reboiras como símbolo da defensa das liberdades e dos dereitos fundamentais. Ademais, enmarcou esta acción na política municipal de recuperación da memoria histórica impulsada nos últimos anos, que inclúe actos de homenaxe ás vítimas do franquismo durante o Día da Galiza Mártir e a instalación dun espazo conmemorativo no Cemiterio Municipal.
Arroxo puxo en valor o papel desenvolvido por Moncho Reboiras no movemento obreiro galego, destacando a súa contribución á creación do Sindicato Obreiro Galego, considerado precedente da actual CIG. Tamén lembrou que non foi ata 2009 cando o Estado recoñeceu oficialmente a súa condición de vítima do franquismo.
Segundo relatou, Reboiras morreu na madrugada do 12 de agosto de 1975 tras unha operación desenvolvida pola Brigada Político-Social no barrio ferrolán de Canido. Despois de varias horas tentando escapar do dispositivo policial, foi alcanzado polos axentes nun portal da rúa da Terra, onde perdeu a vida.
O portavoz do BNG considera que retirar os elementos conmemorativos dedicados a Moncho Reboiras suporía un retroceso nos avances realizados en materia de memoria histórica e insistiu na necesidade de seguir visibilizando a historia das persoas que sufriron a represión da ditadura.