As Carballeiras reclama a mellora da pista deportiva situada detrás do Pavillón Municipal de Lugo
A Asociación Veciñal As Carballeiras reclama ao Concello de Lugo unha intervención na pista deportiva situada na parte traseira do Pavillón Municipal de Deportes ante o deterioro que, segundo sinala, presentan tanto o pavimento como algúns dos seus equipamentos.
A entidade chama a atención sobre a existencia de varias fochancas e zonas do firme en malas condicións, unha situación que dificulta a práctica deportiva e limita o aproveitamento dun espazo público pensado para o uso da veciñanza. A estes problemas súmase, segundo indica o colectivo, o estado da canastra e da portería, que tamén precisarían traballos de reparación ou renovación.
Desde As Carballeiras consideran necesario recuperar unhas condicións adecuadas de seguridade e funcionalidade na pista. “Non pode ser que unha instalación municipal destinada ao deporte se atope neste estado e que a veciñanza non poida utilizala con normalidade”, sosteñen desde a asociación.
Entre as actuacións solicitadas figura o reasfaltado do recinto, coa eliminación das fochancas e a reparación das áreas máis danadas. A entidade tamén demanda que se revisen os elementos destinados á práctica deportiva e que se substitúan ou acondicionen aqueles que presenten un maior desgaste.
Ademais dunha intervención inmediata, o colectivo veciñal considera importante establecer un mantemento periódico destas instalacións municipais. Ao seu xuízo, unha revisión continuada permitiría solucionar pequenas deficiencias antes de que deriven en problemas de maior envergadura e evitaría que os espazos deportivos perdan funcionalidade co paso do tempo.
Por este motivo, As Carballeiras pide ao Concello de Lugo que actúe coa maior brevidade posible para acondicionar a pista e permitir que volva estar plenamente dispoñible para a práctica deportiva e o lecer da veciñanza.